2008年9月25日星期四

短評---愚民樂

我一直認為,香港很多人的知識和見識是不值得擁有這等身家的.

東亞銀行受謠言影響出現擠提.好些中產師奶竟能一下子提出數百萬元現金來,令人咋舌.更好笑的是丈夫也請假去一齊排隊!這等蠢人憑什麼值得擁有如此身家呢?

沒有世界眼光,沒有國際知識也算.至少你也應該知道李氏為何等人?李氏冠,福,國,民四代縱橫政商界百餘年,如果他們出事政府會不出手?富豪們會不出手?如果李氏也能倒下來,我很相信你那幾百萬亦會變成廢紙,香港亦會淪陷.

人蠢至此,還配擁有如此身家?虧你那些老鬼還時常說三道四說現在的年青人不行,不及他當年七個人著一條底褲云云.你老味如果唔係你生得著時,阿貓阿狗都因時勢成英雄的話,你連幫我舔春袋也沒資格呢!

----------------------------------------------------------------------------------
補充
有人說: 雷曼兄弟也是百年老店,投資大行,客戶廣而貴.可是美國政府與財團也不能出手相救.那如何可以相信東亞呢?

答曰: 香港政府與財閥受美國次按風暴影響甚微(除了少數如利豐的馮國經家族以外),跟美國本土的泥菩薩過江完全是兩回事.再者,香港和中國政府有極大量的儲備,怎能跟"爭人周身債",自己都搞唔掂的美國相提並論?更惶論李氏在中港的世交人脈關係,以及其關係人士財力了.

英國的紅酒難飲,不代表法國的紅酒也難飲.氣候不同,土壤不同,環境不同,製作不同也.

2008年9月24日星期三

沒有住過公屋的人是可憐的




我人生有兩大遺憾: 一是沒讀過全日制男女校,二是沒有住過公屋.我覺得那些住在羅便臣道,上幾十個興趣班,幾百堂補習班的小朋友很可憐.他們沒有童年,沒有奇遇,沒有生活.他們的一生只是飾演著父母的傀儡,為他們彌補著過去的遺憾.

他們可能一生人也沒有做過一個決定,就是前面有一個美不勝收,迴腸盪氣的殊遇,他們也不知所措.他們根本就沒有活過.今天沒有活過,他朝也沒有什麼回憶或故事,一切是多麼的平穩而沉悶.

我自己沒住過公屋,卻一直很羨慕住公屋的人.那種鄰里關係,那種家家有個故事,而你是其中一分子的感覺,是住在私人樓的人沒法感受到的.私人屋苑只有無數的保安和密碼鎖,將屋苑和社會重重的隔絕,沒有野貓,沒有流浪狗,也沒有流浪人,只有一模一樣的人,一模一樣的高分低能,在社會中擔當看似不同,實際一樣的功能: 為地產商囤積財富

讀到阿德這篇漫畫,心想我童年可真是白活了!如果我成長的期間有這麼一段曖昧又悠長,溫馨又漫漫的愛情,那有多好?

然而,沒有就是沒有,過去了就是過去了,任憑我他日怎樣成功,怎樣飛黃騰達.這種故事,這種情懷,永遠不可能在我身上出現.唯有阿德的漫畫將這種情懷描繪出來,令我可以在夢中幻想一下,聊以安慰,實在是功德無量.

2008年9月23日星期二

故人甲

都是自己不好,過了那麼多年,還把妳放入facebook裡.
看到妳跟男友在峇里島的相片,可真是郎才女貌.雖然那些表情和姿勢有點難頂.
妳曾經說過,想男朋友黑實一點,大隻一點,妳現在都找到了,而且不只一點.
他外表俊朗,具非凡之格.某觀人多年,略有心得,此君絕非池中物也!
我曾經笑說,世上最幸福的人是洪天明,因為李家誠都要著佢舊鞋.
我不敢這樣孤芳自賞.
不知這些年來,妳可有想起過我?
妳會否在想:
"我怎麼跟這個混蛋混了三年?"
"他雖不才,但終歸對我認真過."
"比起現在這個,他真是狗屁都不如"
"我也跟他行過很多路,是他帶我去認識這個世界的"
"好在當年沒有真的跟他談婚論嫁,原來真是the best is yet to come"

我人生中,從沒有這樣的輸得心服口服.我說話多帶骨,虛偽敷衍的也不少,但這次是真心希望妳們能夠白頭到老,走到最後.縱使,妳不會看到這篇東西,我亦不想妳看到.

祝你們一切都好.
鮑魚頓首.


後話: 這兒我用網名b.y而不用鮑魚本為避難.而b.y.這個名字是妳改的,我記得.

2008年9月17日星期三

雜記

1. 如果人在香港,每年的中秋節例必跟五尻到淺水灣飲酒聽歌睇美女.點知原來而家香港的人咁惡,播歌大聲都要搞到開片打死人.d歌唔0岩聽0即,咪播第二首囉,反正我地包羅萬有,由metal到house到acid到trance到folks,classic都有,連八十年代陳百強張國榮譚詠麟李龍基都有,梗有一隻大家0岩聽掛?

據聞兇器是一樽蜜糖,不知會不會是正冬蜜呢?又,唔知政府又會唔會因為今次事件,要求蜜糖供應商全面回收玻璃樽裝而改用膠樽呢?你知而家政府幾咁敏感0架啦......

2. 美資大行執笠令到股市直線下滑.好0丫,趺到咁上下就有機會入貨啦.個人認為趺到萬五至買,再保守d,等到萬二仲好.我總覺得今次唔係咁簡單.

3. 新聞話好多banker冇工做,好沮喪好慘云云.講真,我真係有d心涼.大家都係大學出0黎,點解佢地出黎搵五萬我搵萬五都冇先?如果冇工業冇生產冇工程佢地又點有得投資?係,我知佢地工作辛苦,但辛苦的程度,知識的差距三四倍咁大呀?

不過如果真係全球性經濟蕭條的話,我回港的日子又要押後了.呢份工冇乜好,最好的就係完全唔受商業市場影響(我公司的產品多銷售到大學,實驗室,研究所.通常都係政府撥款資助的),係淡市中良好的避難所呢.

4. 最近個個都講CERN.講真,佢地的理論我真係半點都唔明,又有d覺得都唔知係唔係老吹.例如話如果做到超越光迎的話就可以時光倒流,邊有可能呀?唔通在世間某個地方某個空間又會有一個我同時進行中?咁點樣同時有兩個我呢?歷史的我同而家的我又點分呢?每年一個我?定每秒有一個我呀?每第一個的話,咁一日咪有86400個我0係唔同的軌道上同時進行?

我又唔明,一粒細過頭髮的質子,同另一粒細過頭髮的質子,點解撞起上來可以有十萬度高溫????個能量係來自個物質,定係速度???

算啦,我真係唔係理科人0黎0架......雖然我係工程佬......

5.有個朋友引述這麼的一段話:

我覺得,傳媒與受眾;政客與選民,從來都係亙動0個播,不存在雞先定蛋先的問題.

於商業角度而言,傳媒當然選擇受眾喜歡的產品.另一方面,受眾亦會被傳媒的產品而影響.

既然如此,先生你在怪誰?

個人而言,我從來都唔多睇獎門人,同樣覺得無線師奶劇戇尻白痴無聊唔好睇,但我唔會話低級或高級囉,亦唔認為有乜唔妥.

你個人喜好係乜係你的事,但你冇資格去評論乜野低級高級.級數,係你主觀的意見.收視,係客觀的數字.周星馳玩屎尿屁,粗口諧音,意淫又歧視同性戀,咁佢低唔低級?

香港低級?講英國呢?Big Brother很高級麼?Little Britain又很高級麼?

難道你真係想香港夜晚黃金時段播BBC Prom?定係播名畫鑑賞?Planet Earth?餐飲禮儀?你想個收線仆直就即管播.

先生唔知有冇睇電視劇?佢有冇發覺無線劇集,永遠主角都會將心裡的說話講出來,睇信時寄件人又會讀出內容,幻想的場面鏡頭會變得朦朧,過去的回憶會用黃色濾鏡.童年回憶仲離譜,修哥會扮學生哥呀陰功!

點解要咁?因為大部份的觀眾係師奶,而唔係你地d文化人呀!無線的劇永遠都係白痴都睇得明,劇情永遠都係人估到.不求高深,只求傳真,只因為師奶們冇你地d文化人咁聰明,而唔係創作人"得咁多料"呀!

好啦,你話獎門人什麼意識不良,危害下一代?我想講,睇得最開心的係師奶同細路仔囉!師奶都未群起投訴,你這個道德佬又來投訴個屁?

講真,你話男人評論女人身材係侮辱,咁女人評論男人身材又如何? "嘩~你對車頭燈好勁呀!" 跟 "嘩~你個胸肌真係可以做枕頭呀!" 又有乜分別?

世上有種男人就係咁,佢先天條件麻麻,後天又缺乏風趣幽默,成世都冇女埋身而自號清高,心底裡又唔抵得人地.結果佢就係咪都企0係女人0個邊度大叫女權,保護女性以爭取支持.

這種人,通稱叫道德佬.

2008年9月15日星期一

中秋

外國的月亮不比香港的圓.是夜密雲,月亮被雲霧罩著,隱隱地滲出點點光,就像我的前路一樣的模糊而黯淡.河邊潺潺的水聲沒有停過,藍森森的山林低沉地呼吸著,卻沒有為我帶來上帝的指示,引領我走出人生的低谷.

2008年9月14日星期日

英國食物! (English food)

1.唔好以為我係陶傑.我才不會一味崇洋數香港.前兩日在高級超級市場waitrose逛逛,見到以上情況,幾乎嚇呆!

四棵加起來比我手掌還小的白菜仔居然要1.89磅,26蚊港紙?有冇搞錯!!?26蚊0係香港可以買幾多白菜呀?三斤都有啦!!

我最想知道的是那些洋人買回去怎麼做?不會用來做沙律吧?烚的話只得可憐的幾條夠做什麼菜?難道做伴碟??但一個伴碟要用差不多兩磅去做,買的人可真捨得呢!

2. 我在英國做過兩份工,接觸過近二百個同事,他們都千篇一律的以為中國人係食sweet and sour xyz為生.每次我都不厭其煩地說: 其實我地好少食甜酸乜物0架.食得最多,其實係公仔面......

3. 論食,英國可以說得上是世上最差.我常跟英國佬說: 法國統治越南近百年,留下不少法國餐廳和飲食文化.荷蘭統治印尼也影響了印尼菜.可是英國統治香港百幾年,卻沒有留下一間fish and chips,這證明你們的食物有多爛!

所以,你跟英國人談食物,是浪費青春,因為他們根本不懂得食!比方說倫敦的邱記茶苑(yauatcha),我認為是我食過最好的點心(比香港絕大多數都好),可是網上食評的review就只屬一般.

因此,英國人的食評是可以不理.當你發覺很多英國人食牛扒居然叫well-done的時候,你對這裡的人還能存有什麼希望?

4. 基本上英國人的喜好就是大肉,大薯和肉汁(gravy).任何食材落到他們手中都會選最鞋口的部份,並致力令它們更鞋.很多年前試過他們的sunday roast,那是將一整隻手脾或豬脾燒熟,然下切片淋肉汁的一種鬼東西.當時我叫了一塊牛,數塊豬,還不厭其煩的告訴他切些肥的,希望沒那麼鞋口.
點知,一上碟已知不妙.肉質像層積岩般成條紋,肉汁全無唯有靠gravy頂上.那塊肉更像clark's的鞋底一樣,三年都磨不爛.食味嘛?就像將樹皮淋上肉汁一樣淡而無味.

雞呢?仲弊.不知為何這裡雞胸貴過雞脾很多.而他們亦能夠將雞胸弄得比原來更鞋烚烚,到意大利餐廳食過一次,真是健絡通活絡油---點滴在心頭.望著這塊雞胸,只想到怎麼才可以將它解決,免致結賬時那麼尷尬......


所以奉勸各位將要來英國讀書/生活的朋友,來之前還是先學會煮幾味吧,免得五臟受罪.


p.s. "English food"這個term,是英國人的自嘲.

2008年9月12日星期五

搵笨菜

人在香港,如要外出用膳,我例必選擇中菜(粵,滬,川,閔,京,魯,潮不拘).何故?因為水準高而價錢廉宜.香港人崇洋崇日得緊要,在香港食西餐和日本料理貴得驚人,而且混水摸魚者甚多.搵笨搵得多,學精了,就不要再碰.

不過多得傳媒吹噓,很多不知所謂的餐廳仍舊在欺客.記得多年前到過銅鑼灣的stonegrill食牛扒,牛
扒肉味淡又過熟,埋單兩人居然過千.翌年不服氣,到了SOHO那邊的stonegrill再試,依然不過矣矣.


更離譜的是前兩年跟大頭到銅鑼灣一間飲食男女內介紹的日本餐廳吃什麼立魚火鍋.媽的!幾片春袋般大的魚片和一堆雜菜,居然要六百幾埋單?更令人氣憤的是"湯底"居然是清水!!兩個人六百幾蚊食個火鍋居然連湯底也欠奉!?結果食到你眼望我眼,大家口淡淡.


然後,今期的飲食男女介紹一間法國餐廳Le Champignon 的La fruit de mer.此菜是我在尼斯時最愛食的,食得多,就懂比高下.先別論材料新鮮高低,我在紙上看不出,但份量真是可憐的少.


內文是如是說:

特 級 海 鮮 拼 盤 $680足 夠 二 人 享 用 , 有 半 隻 覺 蟹 、 兩 隻 Belon0000 、 大 蜆 Cherry Stone 、 翡 翠 螺 和 甜 蝦 , 鮮 味 滿 瀉 。 ( 額 外 加 半 隻 蟹 $180 )

如果換著我,會這樣寫:
AAA cup海鮮拚盤$680,足夠兩位小童享用(0-3歲).半隻覺蟹正在找尋另一半,兩隻Belon 0000相依為命.四隻cherry stone感覺冷清,卻已是碟上的多數黨.三隻翡翠螺壓在覺蟹之下,討論著食客怎樣玩"二人三螺".甜蝦躲在覺蟹背後,逃避正在捕捉它們孤清晚景的鏡頭,堪輿甜蝦,境況堪虞. (覺蟹用眼神懇求食客加多一百八十蚊,讓它與生命中的另一半重聚)

大佬!一隻蟹,兩只蠔!!兩只蜆,三數隻翡翠螺,零星的甜蝦,連黑色那隻細螺及小蝦也欠奉,何來正宗!?足夠兩人享用?我一個人食十份都仲得啦!大概那兩人是吃麵包吃飽的.更搞笑的是額外加半隻蟹$180.半隻蟹!?多麼的寒酸呀!!??其實這種睡眠蟹產量多價錢平,你到高當超級市場waitrose買才三磅七五,六十蚊港紙一隻.你到billingate market買更平,你到法國買,更更平......半隻蟹$180,寒酸得來,食水何其深!!!
在尼斯,一個普通size的la fruit de mer應該是這樣的(其實也算細了,網上找不到更好的照片)索價30到40euro.King size的也不過是60-70euro(連龍蝦,同埋你食食下會覺得冇可能食得晒的蠔).名店如Boccaccio索價100,但我未有能力試過(但那裡的其他菜出色得緊要,是我心中十大餐廳之一,改天再談)


我知道,我是很幸福,經常有機會跑到外國食.不過現在來往歐洲機票很平,兩個人食少幾餐搵笨野,已經夠來回機票到法國肆食一星期.不過他們在香港常食這些搵笨菜,放假跟團到法國卻多數食唐餐,你說怪不怪?

一千蚊,兩個人到鏞記食死你都仲得呀(鮑翅除外)!咪比人搵老襯啦,香港人!


(當然,我都知十中有九去呢d餐廳的都係為溝女啦.唉,女唔係咁溝0架......)

2008年9月10日星期三

逝者如斯

女友的朋友的男友剛剛過身,大家都覺得很震憾: 才廿歲出頭,那麼早就報到?

及後在那位小姐的xanga中看到他剛故的男友.嘩的一聲叫出來: "才俊!" 請相信我,才俊是有樣看的,他們有獨特的五官輪廓及氣質.庸材如我,就算怎樣將名牌鋪上身,也裝不了那個模樣,那種氣質.

該早逝的是英年,唐英年,而不是這位才俊呢!未忘人或有偏見,說得他心地個性都是聖人一般,但即使現實只有她所說的七成,也是一等一的人上人了.

我不知道他是怎樣離世的,看來不似是意外,卻又不像慢性病或癌病,也許是一場急病吧?聽說他在最後的幾分鐘仍與他女友傾電話.我不知道他當時的心怎樣想,大概是: 我都夠鐘啦,帶給別人多點快樂,比眾人都為我傷心好吧?

可惜嗎?可惜.可惜在病發太急,沒機會交代一切了.家母之前患乳癌,經一輪治療後到上月尾終於出報告.出報告的前夕她極之緊張及惶恐,我只好盡我所能安慰她,但我心中卻想著如果換轉我是她,我倒希望醫生跟我說: 你只有半年時間,好好地過吧.我今生已收夠九成籌了,基本上你任何時間將我拿下我也沒有什麼遺憾,如果你給我最後半年,那我還可以利用這半年放懷去做自己想做的事呢.人生做不想做的事很易;做想做的事,極難.才俊之死,最可惜的就是沒有預警,沒有預告,否則他可能將這半年時間都交給女友及家人快樂地過.

人早死並不是最可惜的事,最可惜的是窮一世的精力,庸碌咬牙的過著一生,為了做活做盡自己不想做的事.到退休想著可以做回自己想做的事享福的時候,卻一下被死神召去報到.

想到這裡,我明白為何家母當其時惶惶不可終日.可能這些年來教畫教仔,就是她最不想做的事呢!

才俊,一路走好.喝過孟婆湯,前世今生物我兩忘.別回望,時人故地情感交錯.好人投好胎,來生再跟世界好好的玩樂一場吧.

默言,頓首,合十.

2008年9月9日星期二

鮑魚彩劵,惠澤社群

你地有冇諗過: 如果我係霍震霆的朋友就好啦,有乜事有人關照,就算冇直接得益,介紹份好工比我都好0丫!


有諗過但冇機會?唔緊要!霍震霆就冇啦,馮振庭就有一件!

"嘩!條友長期糧尾!識來有撚用呀?"
說話就又唔係咁講啦.陳振聰起初夠兜踎啦,係咪先?你唔比我第日遇著個翻版小甜甜0架?

拿,就係咁,小弟實在太喜歡小克的聾貓啦!佢近期0係香港又有個展覽播,跟住又出左好多product啦播.咁我又唔0係香港啦播,去唔到展覽又買唔到佢的野啦喎......


真係好鬼得意,好鬼想要呀!拿拿拿,就係咁.今日你投資一百幾十買以上其中一兩件野比我,他朝如果我成為第二個李嘉誠或李家誠,劉巒鴻或劉巒雄的話,我一定會醒野過你播!你諗下?一百幾十蚊就可以搞珠啦播!中獎機會同獎金點都大過六合彩先啦!今日你買件小克,聽日我送層大樓比你,係咪好值搏先?



另外,小克原來都幾靚仔播!阿德都唔係咁肥0即?做乜成日畫到自己真係肥仔一名咁呀?

2008年9月8日星期一

終於吮完了

可能我在山區太悶的關係,這是選舉我是空前注視的.打前幾天就一直追新聞,上youtube看選舉論壇.嘩!吵得多熱鬧,幾個團體的亙片我想比家好月圓還要厲害.黃毓民那段: "民建聯,最無恥" 簡直就是free style battle rapping的樣子,再加上長毛那首: "沒有共產黨,沒有民建聯" 有melody有rapping,為何不搞組合挑戰農夫?

基本上,那些講者在論壇上都沒有什麼point,純粹是亙揭瘡疤亙相指罵.面對這一種鬧劇,該以看鬧劇的心態處之,閣下要是太認真去斟酌一言一句的話,我只可以說: "You are so sad."

鬧劇完了.投票率只得45%,完全不能明白!但結果證明我們不配擁有普選.第一,參選者質素太差,我一直訕笑著台灣選舉的野蠻和胡鬧,豈知原來香港連台灣也不如,枉論歐美了!第二,四成五的投票率,即是就算全部選民都支持普選的話,還不夠半數!!而且當中至少一半是投給建制派吧?究竟民主普選只是一小撮人的一廂情願,還是眾望所歸呢?答案似乎十分清楚.

選舉結果好得不得了,我喜歡的人物全部入選(長毛,毓民,葉劉,馮檢基),唔鐘意的出部出局(田少,周梁,蔡素玉),如果網上有得賭的話,連過七關,有冷有熱,十分和味呢!


後話: 網上好些人很喜歡談論香港的政局,但可笑的是這幫人一邊罵香港人沒獨立思考政治冷感之餘,他們的"意見"卻巧合地跟某報紙的論調幾乎一模一樣.大旗手怎麼擺,他們就怎麼追,然後又指摘別人無知愚蠢人云亦云.

他們那麼愛拾人牙慧,口水相傳,還是吮腳趾比較適合吧?
(在我個list裡那班高人當然不在其中啦)

2008年9月6日星期六

有些事,過去了就是過去了,沒有了就是沒有了,不同了就是不同了.任何的拯救,挽回的嘗試,最終都只會是徒勞無功.

2008年9月2日星期二

雜記

1. 我個人要的野,其實真係好簡單.好似0黎緊兩日會到Birmingham做Soildedge training,由於屬於公務關係,故此可以囉架公司車來用.之前用親公司車都係estate款的舊版Mondero,行左差不多廿萬公里,梗係比人渣乾渣淨.可能因為今次愛來見人,所以安排架新的行政級Mondero,仲要唔係diesel,勁好渣.一比就去,兩腳就上六十(mph),同我架爛鬼VW POLO完全冇得比.

但其實,Mondero真係中價車0黎0架炸播,同阿Bob的AUDI S6,老闆的BMW M5邊有得比?唉,所以咪話我個人要求簡單囉,有架正正經經的Mondero就好開心0架啦,不過我連呢架中價車都買唔起,唉......

不過咁,0係英國,Mondero係路上最惡,乜野波子Aston Martin完全冇得比.因為Mondero基本上係代表住公司車!!即係話,架車唔係我的,who gives a fuck!?睇下你怕揩花定我怕揩花0丫0拿?

又一次證明,私有產權,係極之重要的......



2. 今次同一個叫Steve Cooper的同事一齊去training,條友個樣真係好鬼designer,不過同佢好似冇乜兩句咁,一來我英文差啦,二來我又唔係太認同佢set up的system啦.我做野0個度的engineer分開standard同埋specials,前者負責現有產品的product development同埋新產品的開發,我地specials的就做d customer orders.呢位Steve係standard的project manager,由於我好快做完手頭的野,又要OT呃飯食,所以有時都會做埋佢地0個邊的野.做過先知原來佢地0個邊乜Q都要填form,九千萬樣 documentation.好似你要改一個零件的尺寸咁,你先要填一張叫product change request(PCR)的野,入面有九千個問題問你,包括點解要改呀?影響到邊D parts呀assemblies呀?影響到邊個部門呀?對成本有冇影響呀?等等的問題,但其實絕多數的request只不過係張一個窿由A點移到B點之類的簡單野.

之後就要比張form個project manager去approve,approve左就再填張Product change note(PCN),又係九千條問題,但其實通常都係口頭問左得唔得先填,咁先前填張request把鬼咩?

最搞笑係PCN問的問題同PCR的完全一樣,照抄一次!之後再加一D仲無聊的問題,例如你覺得要用幾多時間去改?跟住做完又要寫返最後你用左幾多時間去改.

然後PCN同PCR都要再0係EXCEL內登記,改完又要0係本parts register book度寫一次,然後再要改product card,之後再send去另一個department度改bill of material......

痴撚線,我試過用三分鐘改一個parts,然後用兩個鐘去做以上0個d野囉!

我以前舊公司,自己出個product change no.跟住改完圖改program,登記返0係個excel度咪得囉,從沒出過什麼錯.

過份管理,好多時候,真係比乜都唔管衰得多......



我懷疑,香港政府成日比人話歎慢板,都唔知係咪承傳左英國呢種傳統.



3. 0岩0岩有得0係屋企上網,感覺真係好.之前想寫d野都要0係屋企電腦打完要save落memory stock返公司post,麻煩之極.

不過可能而家通常放工寫少少的關係,累累地,都係寫口語好.年紀大啦,放工仲用腦,好鬼辛苦.

再者我又冇呀邊個邊個咁儂本多情,今天愛得肚子漲起,聽日愛到浸濕隔離,後日,直頭愛你愛到反晒皮......

我呢種人,都係返屋企睇下咸片好過.誠意推介http://www.punyu.com/完全無料,每日更新,單撈睇在線睇都得!旗下最正0個個女優叫五十嵐,樣靚唔造作,正呀!

2008年9月1日星期一

永不失敗的幾道菜

留得0係英國三五七年,一定有返幾手廚藝傍身.因為英國佬的廚藝屬世界頂級,佢地有能力令根本很難整得難食的野都變得不能入口.例如炒到糊了的炒蛋,或者十二成熟的牛扒等等.叫中國外賣又成日食到d鬼佬中餐,乜野都sweet and sour,想死!最弊佢地做壞手勢,連乾炒牛河都炒到一拔野咁,點食呀?

求人不如求己,以下幾度菜,點整都好難會難食,大家可以試下:

1. 蝦仁炒蛋.

第一件事記住唔好買熟蝦,死梗.第二,買急凍蝦同埋去櫃台度買的蝦完全冇分別,因為後者只不過係將急凍的解左凍咁解,但賣得貴d,搵笨!第三,唔好迷信馬莎,星記,最好的蝦(除非你去billingate買)係tesco的急凍蝦,產自洪都拉斯,耐唔屎仲有買一送一,堅!

好.將蝦解凍,唔駛挑蝦腸0架啦,side氣!用丁咁多麻油同少少紹興酒醃就得,唔好落鹽,廢事出水.蛋,用organic的係香少少,有farm shop的更好,落少少鹽,少少雞粉(即係味精)打暈.

落油,唔好怕肥,唔好孤寒,一孤寒就唔香.猛火燒到佢出煙咁滯跟住落蝦,三扒兩潑拋拋鑊(可能會搶火,因為紹興酒,唔好驚,因為好型)就半熟.趁佢剛轉色時就落蛋,三秒後(唔好多過五秒)熄火繼續炒.幾時上碟隨你,不過半生熟有蛋汁最正!

2. 搖柱籮蔔雞湯

紅籮蔔(carrots),六至八條,一條切三四粒左右,organic與否唔緊要,我食唔出,不過要批皮.搖柱,大量,至少八粒,凍水浸過夜,之後搣絲.雞一隻,tesco完全唔掂,馬莎唔錯而corn feed或organic與否分別唔大,最有味係星記的一隻法國雞,名字記不起,但法國入口的只此一款.貴,但很有味,要好食就唔好孤寒,你去食餐麥記都唔只呢個數啦!

雞斬半,切去肥膏(我自己飲就老死都唔切),剪左帶毛的皮(即係近屎忽附近0個d去唔淨的毛呢),斬甩屎忽(有d人鐘意留返件脾翼煮多餐,我個人唔讚成)

之後,基本上就係一二三泵晒入去死煲爛煲,最少六個鐘,記住睇水,唔夠就加.

一晚飲唔完,而你又住hall包晒水電gas的話,就加雪耳煲個他媽的二十個鐘.唔係講笑,二十個鐘後雪耳溶晒,軟骨溶晒,法國雞後勁依然凌厲,繼續出味.到時飲羹咁飲,好飲得要命!

3. 白烚蟶子

材料: 一架車.首先你要有架車,晨早五點幾渣出london billingate market先買到好蟶子.試過0係nottingham同birmingham market買過,篤極唔郁,完全唔係0個回事.

入門口打橫第三行一轉入去0個檔有個中國籍靚仔哥哥,頭髮濃密冇死錯人.蟶子英文叫razor clam,通常一扎十磅.d蟶子長過你支野,買一扎夠食死兩個人0架啦!

買返黎之後用個水盤開水,勁落鹽(真係勁落勁落0個隻)等佢吐沙,差唔多換三盤水到就吐得七七八八啦.之後就簡單,唔駛醃,唔駛湯底,乜都唔駛,燒一煲水去烚(打邊爐更佳)就得.記住,寧生莫熟,一熟就韌.半生熟時一咬爆出甜汁,不羨仙人(當然,有白酒更好,推介紐西蘭的Oyster Bay,冷飲一流!)

當然,你可以用白酒洋蔥煮都得,不過煩d囉.況且打邊爐咁食一隻烚一隻最能掌握火候,一煲過好易有d太生有d太熟(因為太大隻,你屋企又好難有咁大個煲,有咁大個煲都冇咁大個火).

4. 煎牛扒(羊扒lamb chops更妙!)

去steakhouse叫medium rare比十二成熟你?自己煮好過啦!去TGI Friday's叫一客成十六磅,去waitrose買兩塊dry aged都仲得!個人認為只要係頂級0個隻,tesco,星記,馬莎分別都唔大,尤其以我這個食得極生的人而言.基本上dry aged sirloin steak好難死得錯人.

牛油反而講究,Ozzy賣0個隻"you can't believe it's a butter"同金裝President完全係兩回事.人造牛油同真的牛油冇得比!試過最好係星記的Normandy sea salt butter,內含虛榮.切一大舊牛油,又係0個句,唔好怕肥唔好孤寒.慢火慢慢燒熱佢,一大火就變黑0架啦 !牛扒先前用海鹽同大量的grounded black pepper (用埋steakhouse pepper都得,隨你)醃三兩個鐘.當牛油起泡時就可以落半扒,一落就轉大火,用個產咁佢d肥膏迫d油出黎.一面轉色就去第二面,當另一面都轉埋色就搞掂(呢個係我的食法,基本上極接近生食,咁想食熟d咪轉返中火慢慢煎囉!自己煮就係想自己控制嘛!)

食牛扒好應該配紅酒,有隻星記有售的澳洲酒"乜鬼100" (我成日唔記得個名)極好,七磅四九唔算貴但從不減價.大路d,gallo family飲唔死人,penfolds好d不過又貴一d.女仔唔飲得,就買sangria啦,西班牙果汁酒,盛惠一磅九九,平,易入口,冇得彈!

羊扒基本上係同一道理,不過唔用牛油而用橄欖油而已.羊扒,尤其係lamb chops,點煎都唔會難食,如果你可以整到難食的話,恭喜你,你已經成為英國永久公民了!

摩洛哥之旅1

我覺得我有點像金枝玉葉裡面的家明: 瘋狂地喜愛非洲.不過講到非洲,太多人想到的是土人,原始森林,動物大遷徙等等.

其實非洲有很多面,北非有撒哈拉沙漠,東非有大草原又有高山,南非有現代大都市又有野生動物園,西非有原始森林和美麗的沙灘.所以很難將非洲用某一個模樣去定義.就像摩洛哥,說是北非,主要卻是阿拉伯人,真正的非洲人沒幾個.生活模式和飲食也接近阿拉伯多一些.

這次我們去Marrakech(中譯馬拉卡殊)為了的是Lonely Planet強烈推介,被聯合國定為"世界文化遺產",某旅遊作家認為人生一百個一定要到的地方: Djemaa-el-fna市集.
到了,沒有那作家的驚為天人,也沒有陶傑的"概歎小農社會乜乜物物".只是覺得很像以前香港的大笪地而已: 昏黃的燈火處處,小食的炊煙縷縷.街頭賣藝者吵吵鬧鬧,占星看相的紛紛嚷嚷.說書先生侃侃其談,舞蛇技者惺惺作態.根本就是大笪地嘛!香港人也真夠奇怪,將本來的勝地拆盡,然後又開設一些人有我有的主題公園.結果舊的沒了,新的又不夠人新,兩頭不到岸.唉,看看誰是旅發局主席?周梁淑怡呀!這婆娘要是懂旅行的話,我就在月球上奔跑著啦!
期望越大,失望越大.好在,摩洛哥的按摩Hammam還真是一流.這是一我一生人第一次出外按摩,沒比較,故不知相比北姑泰妹又是如何?只道那裡的陳設裝潢,音樂空調,燈光香薰,都肯定經過精心的安排.一切都是那麼的詳和舒服,又有點出於塵世之感,好像去了另一個世界才有的享受似的.

另外摩洛哥近年興起的池邊派對(pool party)也很不錯.在三十七度的氣溫下浸在仿沙灘的泳池中,四周椰林樹影,天空萬里無雲.呷一口白酒,吹一下水煙,耳聽DJ打碟(HOUSE 為主,出奇地極好!!係比很多英國的都打得好!),可真是不知人世了.
這邊廂邊糜爛奢華,那邊廂卻是刻苦磨練.馬拉卡殊位於盤地,四周被高山包圍著,名為High Atlas.這是我們這次來摩洛哥的另一原因: 行山.

待續