古巴印象---1

鄉下佬出城

第一次踏足美洲,落機的感覺沒有第一次踏足非洲的雀躍(那次,我真係幾乎要親吻土地!).濕熱的天氣,煎蛋的陽光,令我想起香港.

機場就像解放前的大陸一樣: 小,記念品店的貨物發了黃,關員也不太友善,但全部戴上口罩.這時我才想起: 好像中南美洲豬流感好勁播!

一出機場,有鬼人戴罩!?挑!原來扮野!

我落機的地方叫Varadero,就是那些歐美阿伯來浸水打哥爾夫那種地方.我兩點出機場,即日就要到夏灣拿,但巴士六點先有,坐三個鐘,即係有排等.忽然心生一計---不如去巴士站搵人夾錢坐的士去啦.哈!又得播,每人25CUC,18磅左右,OK啦.

的士大佬渣得老練咁慢,都係兩個鐘就到,可想而知巴士係慢到甩轆!我渣的話,個半鐘乜都到啦!

好歹搖到去0個間Casa乜鬼,ok,即係賓館啦!貌似悍匪的屋主咬住雪茄出來迎接,我唔識西班牙文,佢就只識兩三句英文,問乜都話no problem.算啦,間房有冷氣,都已經no problem啦,20CUC(13磅)一晚,不過不失啦.

攬住個相機袋周圍走(因為我怕治安差),感覺好過癮,其時四點幾,日影橫斜下照得人很長.感覺有點似葡萄牙,又有點似澳門(不過冇賭場,頂).五十年代的樓宇都很舊,很爛,但又好乾淨,街上也沒有任何臭味.一直走到海邊,望出海就係加勒比海啦呀?唔,都係咁,有點像尼斯,0靚仔同樣愛跳海.

沿著海邊一直走就到舊城,這裡的樓都喜歡在騎樓底建一條走廊,烈日涼快,落雨又有得避,跟香港的唐樓有異曲同工之妙.只是香港人比較有生意頭腦,愛在枉上賣廣告,呢邊唔興呢家野.大家踎0係騎樓底吹水咁就一日.又或者正確點說,咁就一世.

天氣濕熱冇冷氣,行半個鐘背脊已經出晒水,求期搵間CAFE坐下.一杯Moijto 3CUC(兩磅),我前陣子在倫敦飲,9磅!街上都是五十年代的美國車,又有像蛋一般的電單車的士,以及各式各樣的"巴士"(由美國校巴到豬籠車,密斗都可以成為巴士).街上幾乎每二百米就有警察,幾天下來,我發覺古巴不但不危險,反而可能係全世界最安全的國家之一(鬼咁多警察,落鬼到手咩?)

坐左成個下晝.傍晚忽然肚餓得要命,就求其到賓館附近的餐廳食了.10CUC(7磅)唔算好貴,但唔多好食(之後發覺原來10CUC,食死你都得!)

返房途中見有Rum賣,平平地買左支最貴的Havana Club Reserve, 3.5cuc(2.5磅).開左冷氣後已經撻落床上訓著,冇飲到......