Bastardization vol. 2

1.前排聽李嘉誠話: "君子愛財,取之有道" 0個時,已經有d疑心.上星期見到佢同胡錦濤握手,明晒!原來"取之有道"的"道"唔係指道德,而係指"渠道"/"門路".一睇張相,就知佢唔止大把門路,而且是康莊大道,直通天庭.其他大粒佬又唔駛咁熨的,你地都有路,不過係羊腸小徑0即.

2. 睇住胡總將相,不禁就羨慕起來: 點解人地年紀大我一倍,頭髮多我十倍的? 霸王搵乜鬼成龍賣廣告0丫,搵胡總好過啦!就算真係出事,胡總做代言人,真的假得了!?不過倒轉頭諗,中國除了騙子之外,乜野都可以係假,會唔會胡總個頭髮都係假的呢?甚至連胡總都係假的,睇佢每個笑容,每下拍手都咁機械化.說不定真的胡總早已被江澤民除掉了,這個胡錦濤機械人八號(簡稱胡八)由國安部開發,搖控器當然就在老江的床頭度啦......(我覺得可以以此寫一篇科幻小說播)

3. 胡李會之中,曾蔭權明顯被冷落了.想起陶傑年初的一句: "梁英不振,曾華不俊,曾蔭無權" 倒係應棍.

4. 土庫曼( http://zh.wikipedia.org/zh-tw/%E5%9C%9F%E5%BA%93%E6%9B%BC%E6%96%AF%E5%9D%A6 )真是一個奇怪的國家,但沒有入麼新聞從業員留意到.前幾年,我從Colors看到土庫曼評為世上最冇新聞自由的國家之一(好似係尾三,第尾當然係北韓).年初讀報,全球最快樂的國家之中,土庫曼居然排十七(香港好似係80名以外),跟不丹差不多,已經覺得奇怪.上星期,從報紙得知原來土庫曼的捐獻/義工的排名是全球第五!!

一般來說大家都喜歡將無新聞自由=獨裁=貪污=人民不快樂/被欺壓.但究竟土庫曼發生的係什麼一回事呢?有一天我一定要到這個國家走走看個究竟.

5. 聽老豆講,由於西環地鐵站的其中一個出口將開正0係南雄大廈(我少時的住處)對面,我以前住的單位因而炒到上280萬,比我們賣出時升了差不多三倍.所以話0丫,真係一命二運三風水,0個時冇搬就好囉.好在而家置富花園也升了唔少,我同老豆講: 不如賣左佢轉租啦.除非佢十年內唔趺市,否則至少平手.估唔到佢都有咁諗,真係醒目左播,老豆!

細時唔識野,住開單棟樓就想轉下住屋苑.搬去置富的決定中我都落左不少咀頭,一來因為向海(南雄的單位以前望到一角仔海,後來遮晒),二來時小學有個靚女同學(好似叫陳凱欣?咁上下啦)住隔離的簿扶林花園(但我從未遇過佢,又或者只係我唔認得佢).住落才知到大鑊: 冇街行,冇社區,冇球場,夜晚想落街食碗粥都冇.點似西環有街坊,有人情,有街行,有波打,有機打,仲可以上天台飛垃圾桶蓋訓水喉管咁過癮?有生之年希望我可以0係南雄買返一個單位,於願足矣.

我都唔明點解有人會覺得西九0個炸漾日居,凱旋門,天璽好住?係,係有個維港景.但一落去除了個商場之外只有六條冷冷的行車線同埋一個荒漠.夜晚落去條路越闊越覺得冷清無人氣.咁住落去有乜意思?

所以話,如果問朋友世界上你最鐘意邊個城市,而佢一答就答得出葡萄牙的里斯本的話,呢個人一定有計傾.唔明?去過你就明(如果你係同路人的話).

Bastardization Vol.1

1. 很佩服左丁山,真係一個極出色的中環傍友.這裡沒有貶義,你以為出色的傍友易做?每天睇佢蘋果的GG細語,他寫的東西不單只既得哥情,又不失嫂意.擦鞋之中令人不覺其擦鞋,貌似批評的文章其實又點到即止,差一點就會令人不快,又差一點會令人覺得佢軟皮蛇只識擦鞋.掌握之準確不下於流浮山的蒸魚師傅.再說一次,不是挖苦,沒有貶義,是真心的佩服.

2. 最近有老人/精神病患者在家中失救致死,有政黨批評政府不應只發綜授,更應該關懷佢地,定期派人上門探望.

以我所知,社會福利署係有0架播,我媽身患癌症社署也主動前來問及經濟及醫療上的需要.會唔會掛萬漏一?我唔知.不過我計過條數,就算香港只有五十萬長者/長期病患,社署每年每人探望三次,每次連出入要3個鐘的話,一年要四千五百萬個鐘.當你一個工作人員一日睇三個個案,一年工作三百個工作天,也需要五千人!如果連同管理層平均年薪二十萬,一年需要十億的開銷!這還不包括車錢,行政費,已有的綜援等等.以香港的低稅率,你認為真的可行嘛?

3. 很多人對事物的批評都很尖銳,我不知他們有否自省---自己又係咪事事都做得妥妥當當呢?如果係的話,我相信各位無論在任何行業都一定是尖端份子了,還做什麼批評家?你認為史提芬史匹堡會捨導演之業去寫影評嘛?唔好同我講懷才不遇,懷才不遇只是從前資訊不通的產物.現在只有過剩的頻道給你發表,又點會有懷才不遇? 同樣地,李卓仁什麼也批評一番.唔好同我講,佢心中真係認為: "如果我做主事人,就唔會咁啦" 0下化?

4. 上星期陸遊女士在蘋果撰文批評梁文道資料的錯誤,今個星期梁已先要回應另一文化人方舟子對他的批評.可見文人相輕,槍打出頭鳥,自古已然.我不是道長的粉絲,卻也佩服他在飲食男女中的專欄"味覺視象"---一個從飲食看文化的專欄.我每一期都在想: "睇你仲有乜野野寫" 但佢每期都有新野寫,也有一些不錯的觀點.主題咁局限每期都有貨交(真係唔係行貨,他寫的不是食評呀!),自負如我也肯定自己一世也不能做到.

5. 如果只準用一個詞語去勾劃中國人的特性的話,相信有些人會話"自私",有些人話"貪婪",而我會話係 "妒忌".印度差也自私,亦極其貪婪,但論妒忌,中國人無出其右.其妒忌之精要在於: "我唔發達唔緊要,最緊要你窮過我."

你一定有聽過呢類的說話 :"佢?SALE屎仔黎之嘛!?" "佢當年?UNDER我0架之嘛!" "佢叻啦,識擦鞋,而家唔識人啦!?"

所以重複一次,古惑仔一裡面浩南同兄弟0係澳門比人都0個幕,巢皮比人砍下時講0個句: "南哥!走呀!一個人死,好過含家產呀!" 係全錯的.

真正的香港仔,口中0個句應該係: "南哥,救我呀!我地同一屋村大,要念舊情呀!" 心中0個句卻應該係: "南哥,唔好走呀!含家產,好過一個人死呀!"

6. 英文裡面,係冇"折墮"呢個字的.折墮,正正是妒忌者最大慾望.每年的台慶劇,0個D創世記呀,天地乜乜 0個D,一定有呢句對白: "睇你/你地幾時折墮!" 可見作為一個中國人,最大的快樂莫過於睇住被妒忌者(通常係成功人士啦)的折墮.

所以話,我地好應該多謝陳振聰.佢越折墮,香港人的"國民快樂指數"就越高.

7. 同樣地,英文係冇叩頭這個字,所以佢地借用左中文,變成kowtow.唔係我作出黎0架,係真係英文字黎架!

Dictionary.com入面係咁寫的:

kow·tow   [kou-tou, -tou, koh-]

–verb (used without object)

1. to act in an obsequious manner; show servile deference.

2. to touch the forehead to the ground while kneeling, as an act of worship, reverence, apology, etc., esp. in former Chinese custom.

–noun

3. the act of kowtowing.

點解英文本身冇呢個字呢?你自己諗.咁中國人向人地叩頭時心裡面係諗緊咩呢?

之唔係: "睇你幾時折墮" 囉!