風水大師鮑魚---牛年預測

二零零九年的牛年將屬刻苦之年,牛是刻苦耐勞的動物,所以今年大家都要搵辛苦錢,切勿投機.如果要在股市搏殺,宜取三,六,八,十有關的號碼.0666禹銘投資,666在西方是邪門號碼,但於中國是三三不盡,六六無窮之解.0008電訊盈科,比人私有又點,有個8字就得.0857中石油,李丞責話10係解十全十美咁解.8-5+7=10.咁都得?就係咁都得!如果唔係點叫風水佬呀?

白龍皇尋日鄭重地贈兩個字比香港人: 忍耐. 我鮑師傅贈多兩個字過你: 等待.
係咪好高深呢?唔高深點做風水佬呀?至於等乜?要睇命格,等人等工開等巴士等時機等司機等運到.你想知你要等乜?都話要睇命格囉,批命三千,睇全相加五百,送抽獎.

世界方面,二月至三月加拿大會有大雪,南半球卻會熱浪迫人.中國今年會有水災,倫敦長期陰雨綿綿,香港四月會有長達一個月的回南天.奧巴馬會繼續做總統,陳水偏會有排坐監,金正日會公開露面,麥格比夫人會再到香港掃貨.香港方面,政府持續出錯,問責官員留任,老曾會聽阿爺話,亞視繼續蝕錢,阿sa紅過阿嬌,徐子琪生多一件.

個人方面,做老闆的要對員工尊重,得到的回報更多.打工的勤力拚搏,總有出頭天.做仔女的今年要孝順,做父母的牛年要好好管教仔女.情侶要亙相體諒,朋友要亙相扶持,兄分姊妹要和睦,損友切記疏遠.炒窩輪切勿盡搏,有儲蓄不妨投資.

好,講住咁多先,天機不可洩.大家牛年謹記戒急用忍,以平常心處之,活在當下,珍惜眼前人,退一步海闊天空,凡事留一線,得饒人處且饒人.祝各位事事順利,再見!